اقتصاد

المقاول الذاتي 2024 mo9awil dati .. شرح شامل بالدارجة المغربية

المقاول الذاتي في المغرب mo9awil dati .. من بعد ما كنا نشرنا واحد المقال كيتحدث على كيفية استخراج فيزا المقاول الذاتي للسفر الى اسبانيا  وصلتنا بزاف ديال الرسائل من طرف المتابعين ديالنا على صفحة أمجد فالفيسبوك كيقتارحوا فيها علينا نكتبو شي مقال توضيحي على المقاول الذاتي في المغرب من الطاق طاق حتى لسلام عليكم.

هداك علاش غادي نخصصو اليوم هاد المقال باش نطرقو هاد المسمار ونجاوبو فيه على ڭاع الأسئلة اللي متعلقة بهاد الموضوع.

وعلى غير العادة ديالنا اضطرينا نكتبو هاد المقال بالدارجة المغربية، لأنه بالدرجة الأولى موجه للقراء المغاربة، وكذلك باش يستطع الجميع الاستفادة منو بشكل متساوي.

شنو هو المقصود بنظام المقاول الذاتي في المغرب ؟

أول حاجة الى بغينا نعرفو ما هو المقاول الذاتي خاصنا نرجعو للتعريف القانوني ديالو

وفالتعريف القانوني ديالو هو واحد صيغة مقاولاتية اختيارية جديدة (يعني ماشي مفروضة على أي واحد) صدرت فظهير شريف رقم 1.15.06 بتاريخ 19 فبراير 2015 الصادر بتفيذه القانون رقم 114.13 والمنشور فالجريدة الرسمية عدد 6344 بتاريخ 12 مارس 2015 المتعلق بنظام المقاول الذاتي.

هاد النظام جا على أساس محاربة القطاع الغير مهيكل وتشجيع عباد الله يخدموا على راسهوم وعند راسهوم خصوصا :

  • الناس اللي باغيين ينشأو مقاولة
  • الناس اللي كيخدموا فقطاع غير منظم
  • الطلبة والناس ديال التكوين
  • المتدربون
  • الناس اللي مشومية

وأيضا جا هاد النظام لتسهيل الإجراءات الإدارية باش يقدروا هاد الناس يدخلوا لمجال المقاولات ويحصلوا على التمويل من مؤسسات القروض.

الموقع الرسمي لنظام المقاول الداتي في المغرب ae gov ma

يعتبر موقع ae.gov.ma الموقع الرسمي لنظام المقاول الداتي حيت يمكنك من ادارة جميع الأمور المتعلقة بهدا النظام  وندكر من بينها.

  • التسجيل في نظام المقاول الداتي
  • تحميل نمودج الفاتورة الخاص بالمقاول الداتي
  • التصريح برقم المعاملات ودفع الضريبة المستحقة ( التصريح يجب أن يتم كل 3 أشهر ) 

يمكنك ادارة حسابك الخاص بنظام المقاول الداتي مباشرة من خلال الرابط ae gov ma mon compte

 

دعم المقاولات الصغرى بالمغرب 2024 .. كيفية انشاء مقاولة للاستفادة من برنامج دعم وتمويل المقاولات

شكون هو المقاول الذاتي ؟

المقاول الذاتي أو بالفرنسية auto entrepreneur ( أو بلغة الشات mo9awil dati )  هو أي واحد كيخدم عند راسو فشي صنعة أو حرفة أو تجارة أو تقديم الخدمات.. ومن هاد الخدمة كيصور مصريفة باش يعيّش راسوا وعائلتو

لكن باش يتعتابر الشخص مقاول ذاتي خاص ما يدوزش رقم أعماله السنوي خلال عامين متتالين :

  • 500.000 درهم (50 مليون سنتيم) الى كان صنايعي أو تاجر (بياع شراي) أو حرفي
  • 200.000 درهم (20 منيول سنتيم) الى كان كيقدم المقاول الذتي الخدمات .

وزارة الصناعة والاستثمار والتجارة والاقتصاد الرقمي دارت واحد اللائحة كتبين فيها شنو هوما لخدامي اللي يقدر الواحد على إترهم يولي مقاول ذاتي.

اللائحة فيه لغضب ديال لخدامي هاداك علاش غادي نخليوها لآخر المقال باش تقدر تطالع عليها كلها.

طريقة التسجيل في المقاول الذاتي 2024:

  1. إعداد ملف التسجيل الخاص بك كمقاول ذاتي (mo9awil dati) ذلك من خلال البوابة الإلكترونية (هنا
  2. أملأ و أطبع استمارة المقاول الذاتي: وذلك أيضا من خلال البوابة الالكترونية (هنا
  3. أضع ملف طلب التسجيل كمقاول ذاتي مصحوب بالوثائق المطلوبة في أحد شبابيك الشركاء البنكيين لبريد المغرب،
  4. تتبع وضعية طلب التسجيل الخاص بك من خلال الدخول إلى حسابك على البوابة الإلكترونية التي سبق وذكرنا.

* :الشركاء البنكيون لبريد المغرب :البريد بنك, التجاري وفا بنك, البنك المغربي للتجارة الخارجية , البنك الشعبي , القرض العقاري والسياحي , مجموعة القرض الفلاحي للمغرب والشركة العامة المغربية للأبناك.

امتيازات المقاول الذاتي 2024 :

شحال من واحد غايقول شمن ربح عندي أنا فهاد نظام مقاول الذاتي ؟ واش غادي يكون عندي شي امتيازات أو غي فريع الراس؟

نظام المقاول الذاتي وبحسب الإمتيازات اللي مذكورة في الموقع الرسمي للمقاول الذاتي اللي محسوب على وزارة الصناعة والاستثمار والتجارة والاقتصاد الرقمي قالك أسيدي باللي المقاول غادي يكونو عندو بزاف ديال الامتيازات بحال:

الامتيازات الجبائية والضريبية:

المقاول الذاتي غادي يستافد من امتيازات خاصة بالضريبة على الدخل وامتيازات على  الضريبة ديال القيمة المضافة وامتيازات على صافي زائد القيمة وامتيازات على الرسم المهني.

وحنا غادي نشروح كل امتياز بوحدو باش توضاح الصورة أكثر

1_ الضريبة على الدخل:

  • الصنايعي أو التاجر أو الحرفي غادي يخلص غي 0,5% كضريبة على رقم الأعمال المحصل عليه واللي مكيتجاوزش 50 مليون سنتيم
  • مقدم الخدمات غادي يخلص غي 1% على رقم الأعمال المحصل عليه واللي مكيتجاوزش 20 مليون سنتيم

وللاطلاع على المزيد من التفاصيل حول ضريبة المقاول الذاتي المتعلقة بقانون المالية المغربية للسنة 2024 نترككم مع هذا الفيديو على يوتوب والذي يشرح بشكل معمق هذا الأمر

2_ صافي زائد القيمة :

المقاول الذاتي كيخضع للتشريع والأنظمة الجاري بها العمل على الدخل بتطبيق الأسعار المشار اليها في المادة 73-III بعده على رقم الأعمال السنوي المحصل عليه.

غير هو اللي خاصك تعرف بللي صافي زائد القيمة اللي وصلو المقاول الذاتي من خلال تفويت أو سحب الأموال المجسدة أو غير المجسدة المخصصة للاستغلال، كتبقى خاضعة للضريبة كيفما هو منصوص عليها في المادة 40-I وأيضا بحسب جدول ديال الأسعار اللي موجود في المادة 73-I 

كنصيحة يمكن ليك تدخل لهاد الرابط اللي غادي تلقى فيه pdf ديال المدونة العامة للضرائب واللي غادي تلقى فيه أيضا هاد المواد اللي هضرنا عليها.

  • المادة 40-I غادي تلقاها فالصفحة 65
  • المادة 73-I غادي تلقاها فالصفحة 100
  • المادة 73-III غادي تلقاها فالصفحة 104

3_ الضريبة على القيمة المضافة TVA :

المقاول الذاتي معفي من الضريبة على القيمة المضافة مادام أن رقم الأعمال السنوي المحصل عليه مكيتجاوزش 500.000 درهم (50 مليون سنتيم)

4_ الرسم المهني LA PATENTE :

المقاول الذاتي غادي يتعفى من الرسم المهني المعروف بـ LA PATENTE لمدة 5 سنين . وكتبدا من العام اللي بدا فيه صاحبنا يخدم كمقاول ذاتي.

غير هو راه المقاول الذاتي كيبقى خاضع لنفس قواعد المراقبة والنزاعات والتقادم والعقوبات المنصوص عليها للناس اللي خاضعين للضريبة  برسم الدخول المهنية حسب النظام الجزافي.

امتيازات أخرى يستفيد منها المقاول الذاتي في المغرب:

كاينين امتيازات أخرى يقدر يستافد منها كل شخص بعد تسجيل في المقاول الذاتي

  • ماشي ضروري يكون عندو سجل تجاري
  • الاعفاء من مسك محاسبة الواجب على التجار العمل بها
  • يقدر يخدم في المحالات المخصصة لنوع الخدمة ديالو، والى ماكانش عندو محال يقدر يخدم فدارو، أو فشي محال كيشتركو فيها بزاف ديال المقاولات مع ضرورة احترام هاد العمل النصوص التشريعية والتنظيمية و القوانين الجاري بها العمل
  • المقاول الذاتي مغاديش يخاف من السيزي الله يحفظ لدارو (حجز المنزل) بسباب الديون اللي كتسالو واللي مرتابطة بالنشاط المذكور
  • أيضا المقاول الذاتي ولاّ من حقو يستافد من التغطية الصحية أيضا ابتداء من تاريخ التسجيل في المقاول الذاتي
  • المقاول الذاتي يقدر يعطي الفاتورة

تمويل المقاول الذاتي 2024 :

جديد المقاول الذاتي 2024  .. مؤخرا وبتاريخ  3 فبراير 2021 تم الاحتفال باطلاق البرنامج المندمج لدعم وتمويل المقاولات الصغيرة جدا والصغيرة من طرف وزارة الاقتصاد والمالية وبنك المغرب والمجموعة المهنية لبنوك المغرب وصندوق الحسن الثاني للتمنية الاقتصادية والاجتماعية.

هاد البرنامج اللي طلقو عليه اسم ” انطلاقة ” غادي يمكن عدد كبير من الفئات المستهدفة بما فيها المقاولين الذاتيين وأصحاب المشاريع الصغيرة جدا من الحصول على تمويل

الى كانت عندك شي فكرة مشروع وبغيتي تعرف كيفية دعم المقاول الذاتي وكيفاش غادي يتم تمويل المقاول الذاتي 2024 فما عليك غي تقرا هاد المقال.

البرنامج المندمج لدعم وتمويل المقاولات في المغرب “انطلاقة” .. كل ما تريد معرفته عن هذا الموضوع

بخصوص الدعم المخصص للمقاوليين الذاتيين بسباب فيروس كورونا يمكن ليك تطالع عليه من هاد المقال

تمويل المقاول الذاتي 2024 .. صندوق الضمان المركزي يطلق “ضمان المقاولين الذاتيين كوفيد 19”

شنو هي شروط الحصول على صفة المقاول الذاتي 2024

باش تقدر تولي مقاول ذاتي خاص توفر فيك مجموعة من الشروط اللي هي ساهلة :

  • خاص تكون كتمارس شي خدمة سوا فمجال الصناعة أو الحرف أو التجارة أو الخدمات؛
  • خاص مايتعداش رقم الأعمال السنوي اللي حصلتي عليه فعامين متتاليين 50 مليون سنتيم الى كنتي صنايعي أو حرفي أو تاجر.. أو ما يتعداش رقم الأعمال السنوي ديالك 20 مليون سنتيم الى كنتي كتقدم الخدمات؛
  • خاص تنخارط في نظام الضمان الاجتماعي المنصوص عليه وهو الصندوق الوطني للضمان الاجتماعي؛
  • خاص  تتسجل في السجل الوطني للمقاول الذاتي .

أيضا من الشروط الضرورية باش يحصل الشخص على صفة المقاول الذاتي خاصو يكون مغربي ، أو براني (أجنبي) عايش في المغرب ومطلع وراق الاقامة .

الأجنبي المقيم في المغرب يقدر حتى هو يولي مقاول ذاتي في المغرب الى كانت الاقامة ديالو فالمغرب قانونية وكيتوفر على مقر جبائي بالمغرب.

كيفية انشاء بطاقة المقاول الذاتي (أو كيفية التسجيل في السجل الوطني للمقاول الذاتي) :

كيف احصل على بطاقة المقاول الذاتي ؟ 

باش تقدر تحصل على بطاقة مقاول ذاتي 2024 خاصك أولا تتسجل في السجل الوطني للمقاولة الذاتية

وباش تقدر تتسجل في السجل الوطني للمقاول الذاتي خاصك تدوز من المراحل التالية:

  • خاص يكون عندك عنوان الكتروني خدام (gmail أو email … رقم الهاتف المقاول الذاتي )
  • خاصك تعمر استمارة المقاول الذاتي 2024 اللي هي عبارة عن طلب التسجيل في المقاول الذاتي اللي كيوازي طلب التصريح بالتأسيس فالأنترنت فالموقع الرسمي للمقاول الذاتي ولكن غادي يكون عليك تصاوب حساب مقاول ذاتي باش تقدر تعمر الاستمارة
  • من بعد ما تعمر الاستمارة غادي يكون عليك تطبعها وتسنيها وتدفعها فشي بنك شريك لبريد بنك فأجل مكيتعداش 30 يوم على النهار اللي تسجلتي فيه

بطاقة مقاول ذاتي .. شرح مفصل وبالصور لطريقة ملء استمارة المقاول الداتي بالمغرب 2024

أشمن عنوان خاصني نصرح بيه على حسابي في المقاول الذاتي :

مين تكون باغي تسجل فالسجل الوطني للمقاول الذاتي تقدر تدخل جوج عناوين
أثناء عملية التقييد بالسجل الوطني للمقاول الذاتي، يمكن ادخال عنوانين: العنوان الأول يجب أن يكون نفس العنوان المشار اليه على بطاقة الهوية بينما العنوان الثاني متعلق بمكان مزاولة النشاط في حالة ما إذا كان مغاير للعنوان الأول.

شكون هوما الأبناك الشركاء لبريد بنك ؟

من بعد ما تعمر استمارة المقاول الذاتي بالمغرب 2024 كيفما قلنا غادي يكون خاصك تدفعها لشي بانكة، وتكون هاد البانك شريكة لبريد بنك:

والشركاء البنكيين لبريد بنك هوما :

  • البريد بنك AL BARID BANK
  • البنك الشعبي BANQUE POPULAIRE
  • التجاري وفابنك Attijariwafa Bank
  • الشركة العامة SOCIETE GENERALE
  • BMCI بنك GROUPE BNP PARIBAS
  • BMCE BANK
  • القرض الفلاحي CREDIT AGRICOLE
  • مصرف المغرب CRÉDIT DU MAROC
  • البنك المغربي للتجارة الخارجية
  • القرض العقاري والسياحي

المهم مين تبغي تمشي تدفع الطلب فالبانكة اللي اختاريتي (سواء بطاقة المقاول الذاتي التجاري وفا بنك أو  BMCI بنك …) خاص تدي معاك هاد لوريقات:

وثائق المقاول الذاتي :

الوثائق المطلوبة للحصول على بطاقة المقاول الذاتي :

  • نسخة من بطاقة التعريف الوطنية الإلكترونية أو من بطاقة الإقامة للأجانب
  • صورة التعريف حديثة، ذات خلفية زرقاء أو رمادي فاتح على شكل 35 مم x مم 45 لمقدم الطلب
  • الاستمارة اللي عمرتي من الأنترنت وخاصك  تكون موقعها بيديك .

واش يقدر المقاول الذاتي يدفع الطلب في CIH BANK ؟

cih bank ماشي من البنوك الشريكة لبريد المغرب، هداك علاش ميقدرش المقاول الذاتي يقدم الطلب فيها .

البنوك اللي يقدر يدفع فيها الشخص الطلب ديالو هي اللي دكرنها لفوق..

مميزات المقاول الذاتي التجاري وفا بنك:

كيقدم التجاري وفا بنك للمقاول الذاتي حلول ناجعة للاستفادة من خدمات البنك عن بعد وذلك عن طريق:

  • تحكموا في تدفقات الخزينة ديالكم،
  • تمويل استثماراتكم،
  • تطوير نشاطكم.

لكافة المعلومات والتفاصيل يمكنك استعمال الرقم التالي: 05.22.58.88.88 (212+) من الإثنين إلى السبت من الساعة الثامنة صباحا إلى الساعة الثامنة ليلا

من بعد تقديم الطلب كيفاش غادي نولي مقاول ذاتي ؟

ملي كتقوم  بجميع مراحل تسجيل في مقاول الذاتي كتولي حامل لصفة مقاول ذاتي وكتولي معروف بشكل رسمي عند مصالح الضريبة وكيولي عندك:

  • رقم التعريف الموحد ICE؛
  • رقم التعريف الجبائي؛
  • رقم التعريف بالنسبة للرسم المهني.

شحال ديال الوقت باش نحصل على بطاقة المقاول الذاتي ؟

المدة القانونية باش تحصل على بطاقة المقاول الذاتي هي 15 اليوم

مميزات بطاقة المقاول الذاتي :

بطاقة المقاول الذاتي هي بمثابة اثبات للزبناء والممونين أن فلان بن فلان كيزاول واحد النشاط في اطار نظام مقاول الداتي .

هاد البطاقة كتمكن أي مقاول داتي يحصل على اعتراف في المجالات الاقتصادية والاجتماعية

واش يقدر الموظف العمومي يحصل على شهادة المقاول الذاتي :

ألاّ سيدي .. راه القانون كيمنع أي موظف عمومي يخدم خدمة ثانية كيفما كانت سوا عند راسو أو عند بنادم. على هذاك علاش الموظف ميقدرش يحصل على شهادة المقاول الذاتي .

حسب المادة حسب المادة 15 من القانون العام للوظيفة العمومية كنلقاو:

“يمنع على كل موظف مزاولة نشاط ربحي خاص او محسوب على القطاع الخاص بصفة مهنية كيفما كان نوعه تحت طائل الإجراءات التأديبية… “

واش الناس اللي ديجا خاضعين للضريبة المهنية يقدوا ينخارطو في نظام المقاول الذاتي؟

الناس اللي كيزاولو شي نشاط كيخضع للضريبة المهنية سوا كانو معنويين أو ذاتيين ميقدروش يأسسوا  مقاولة ذاتية .

ولكن الى كانوا سالاو من هاد الخدمة ودارو ڭاع الاجراءات باش يوقفو النشاط ديالهم داك الساعة يقدروا ينخارطو في نظام المقاولة الذاتية

الى كنت شريك أو مساهم فشي شركة واش نقدر نولي مقاول ذاتي ؟

الى كنتي شريك أو مساهم فشي شركة ولكن مكتزاول فيها حتى شي نشاط فراه يمكن ليك تنخارط في نظام المقاولة الذاتية .

شنو هي المهن الغير مقبولة في نظام المقاول الذاتي ؟

كاينين واحد النوع ديال لخدامي ميمكنش لمولاها يتسجل في نظام المقاول الذاتي، والجدول اللي فهاد الصورة كيذكر جميع أنواع المهن والأنشطة والخدمات المستثناة من تطبيق نظام المقاول الداتي

المهن و الأنشطة و الخدمات المستثناة من تطبيق نظام المقاول الذاتي
المهن و الأنشطة و الخدمات المستثناة من تطبيق نظام المقاول الذاتي ____ مصدر الصورة: مجموعة بريد المغرب — السجل الوطني للمقاول الذاتي

لائحة الأنشطة المقبولة والغير مقبولة في مهن المقاول الذاتي 2024

كيفاش داكشي ديال الضريبة والاقرارات اللي خاص المقاول الذاتي ييقى يديرها ؟

مين كتولي مقاول ذاتي غادي تولي خاصك دير

1_ الإقرار برقم الأعمال الخاص بالمقاول الذاتي :

بحسب نظام المقاول الذاتي خاص الشخص الخاضع للضريبة يصرح برقم الأعمال المحصل عليه في كل 3 شهور في أو وفق واحد المطبوع نموذجي كتشدو من البنك .

خاص الشخص يدير هاد التصريح والادلاء فكل 3 شهور قبل نهاية الشهر الموالي لـ 3 شهور اللي دازت والل خلالها تم تحصيل رقم الأعمال في البريد بنك .

2_ الإقرار بالتوقف أو التفويت أو تغيير النشاط المقاول الذاتي

الشخص الخاضع للضريبة بحسب نطام المقاولة الذاتية خاصو يدفع الاقرار المشار اليه أعلاه فشي وكالة بريد بنك طبقا للتشريع والأنظمة الجاري بها العمل بنفس الشروط المنصوص عليها بالمدة 150 في المدونة العامة للضرائب.

3_ انجاز الإقرار الالكتروني من طرف المقاول الذاتي:

دائما وبحسب نظام المقاول الذاتي للناس الخاضعة للضريبة، فراه يقدرو يدفعو الاقرار برقم الأعمال الخاص يهم بطريقة الكترونية سوا  من حسابهم الخاص بالمقاول الذاتي عبر بوابة بريد المغرب أو سوا فبنك تابع للبريد بنك.

هاد الإقرارات الإلكترونية عندها نفس الآثار القانونية المتعلقة بالإقرارات المنصوص عليها فالمدونة العامة للضرائب

غير هو  ابتداء من 1 يناير 2019 راه تم التخفيض من الحد الأدنى لمبلغ لخطية المحددة سابقا في 500 درهم الى 100 درهم بالنسبة للزيادة المطبقة على:

  • اللي مدفعش، أو اللي دفع معطل على التاريخ المحدد للإقرار برقم الأعمال
  • الغرامة المطبقة في حالة الإقرار الناقض أو الغير كافي إذا لم يكن للعناصر الناقصة أو المتضاربة تأثير على أساس الضريبة أو على تحصيلها.

كيفاش يقدر المقاول الذاتي يخلص الواجبات الضريبة؟

مبلغ الضريبة المستحق بالنسبة للمقاولة الذاتي كيتأدى تلقائيا بإحدى الوكالات التابعة للبريد بنك بشكل ربع سنوي أي كل 3 شهور

وخاص هذا المبلغ يتأدى قبل نهاية الشهر الموالي للربع الذي تم خلاله تحصيل رقم الأعمال.

واش كاين شي سلف مقاول ذاتي ؟

بنك المغرب كيعتارف بالمقاول الذاتي كفاعل اقتصادي جديد. هداك علاش يقدر يستافد من الخدمات المالية بحال باقي المقاولات الأخرى.

كاينين شي بنوك كتقدم سلف للمقاولين الذاتين وكاين بنوك أخرى ناوية تدخل على الخط من خلال انشاء عروض خاصة بالمقاولين الذاتيين.

كاين أيضا مجموعة من الجمعيات والمؤسسات اللي كتقدم الدعم المالي للمقاولين الذاتين على شكل قروض شرفية.

واش المقاول الذاتي يقدر يعطي الفاتورة ؟

نعم يقدر المقاول الذاتي يعطي فاتورة فالمعاملات ديالو .

فاتورة المقاول الذاتي معترف بها من طرف ادراة الضرائب بموجب القانون 114.13

غير هو اللي خاص تعرف بللي القيم المفوترة توجد خارج نطاق الضريبة على القيمة المضافة

كاين هناك واحد النموذج موحد ديال فاتورة المقاول الذاتي ، ولكن الى بغيتي تدير شي فاتورة خاصة بيك راه ممكن، غير هو خاصك  تحتارم المعايير المحاسباتية الخاصة بالمعلومات اللي خاصها تكون في الفاتورة

واش المقاول الذاتي يقدر يكون عندو ختم (CACHET)؟

نعم بعد انشاء مقاولة ذاتية في المغرب يقدر المقاول الذاتي يدير الختم أو الطومبو أو الطابع أو الكاشي ديالو بحالو بحال كافة الفاعلين الإقتصاديين.

واش يقدر المقاول يشغل معاه معاونين ؟

من السمية ديال المقاول الذاتي تعرف الجواب ، يعني كتخدم بوحدك وعند راسك مكتخدم مع حد، مكيخدم معاك حد.

وعليه ما خاصكش تخدم معاك معاونين ، والى بغيتي تخدمهم خاصك تنتقل لاطار قانوني آخر من غير المقاولة الذاتية

كيفية الغاء بطاقة المقاول الذاتي :

كيتم إلغاء بطاقة المقاول الذاتي من السجل الوطني للمقاول الذاتي فهاد الحالات:

  • طلب من المقاول الذاتي كيقول بللي باغي يسالي حيث توقف على هاد النشاط المهني أو حيتاش فات المقاولة ديالو جزئيا أو كليا.  كيقدم الطلب فمطبوع نموذجي تعده الإدارة مرفوق بالإقرار برقم الأعمال وكيتدفع فإحدى الشبابيك التابعة لبريد المغرب؛
  • كتسحب من الشخص شهادة المقاول الذاتي مين مكيصرحش برقم الأعمال السنوي أو كيصرح بعدم تحقيق لرقم أعمال برسم سنة مدنية باستثناء التي تم فيها تسجيله أو اعادة تسجيله؛
  • مين مكيخلصش المقاول الذاتي الضريبة والاستراكات الاجتماعية لمدة سنة مدنية؛
  • مين كتحول المقاولة الى شركة كيفما كان شكلها القانوني؛
  • الى صرح المقاول الذاتي برقم أعمال كيتجاوز السقف المحدد لمدة عامين متتاليين.
  • يتم سحب بطاقة المقاولة الذاتي ابتداء من تاريخ التبليغ بنسخة من صدور حكم قضائي كيقضي بالتشطيب على المقاول الذاتي من السحل الوطني لعدم احترامه للقوانين المنصوص عليها خلال مزاولة نشاطه

التغطية الصحية للمقاول الذاتي :

فشهر يوليوز 2017 تنشر في الجريدة الرسمية القانون 98-15  المتعلق بالتغطية الصحية الخاص بفئات المهنيين والعمال المستقلين والأشخاص غير الأجراء الذين يزاولون نشاطا خاصا من بينهم المقاولون الذاتيون.

لكن لحد الآن مزال كيشتاغلو على المراسم التطبيقية لتمكين المقاولين الذاتيين من الاستفادة من جميع المزايا اللي كيمنحها هاد النظام بخصوص التغطية الصحية، من بعد أداء اشتراكات دورية سيتم تحديدها بالنسبة لكل فئة

نظام تقاعد المقاول الذاتي بالمغرب 2024 :

أيضا تم نشر القانون 99-15 المتعلق بالنظام التعاقد للمهنين والعمال المستقلين والأشخاص الغير أجراء بما فيهم المقاولون الذاتيون.

لكن لحد الساعة مكاين والو في انتظار المراسيم التطبيقية لتمكين المقاولين الذاتيين من الاستفادة من نظام التقاعد .

المقاول الذاتي والفيزا :

الفيزا بشكل عام ديال أي بلد وبالخصوص فيزا شنغن كتطلب من الشخص اللي باغي يحصل عليها، يقدم ضمانات بأنه باغي يسافر لأوروبا لشي غرض (سياحة، زيارة، تدريب ….) وغادي يرجع لبلادو من بعد مايقضي هاد الغرض، وتكون عندو الأموال الكافية باش ينفق على راسو خلال السفر

وباش يثبت هادشي خاصو يبين بللي عندو وظيفة أو شي مشروع أو شي وسيلة قانونية باش كيدخل طريف دلخبز.

بطاقة المقاول الذاتي هي احدى وسائل الإثبات أن الشخص كيمارس واحد المهنة بشكل قانوني وعندو منها واحد المدخول.

السؤال اللي مطروح هو واش أي مقاول ذاتي يقدر يحصل على الفيزا ؟

للأسف منقدروش نجاوبو على هاد السؤال حيت فيزا المقاول الذاتي كتطلب بعض الشروط اللي غادي نتكلمو عليها فمقال قادم .

لائحة مهن المقاول الذاتي 2024 :

مهن المقاول الذاتي كيفما أشرنا كتنقسم للجوج قسمين هما

  1. المهن اللي كدخل فاطار الأنشطة الصناعية والتجارية والحرفية
  2. المهن اللي كدخل فاطار الأنشطة اللي كتعتبر خدمات

وحنا غادي نقدموا ليكم كافة انشطة المقاول الذاتي نقلا عن وزارة الصناعة والاستثمار والتجارة والاقتصاد الرقمي 

1_ الأنشطة الصناعية والتجارية والحرفية :

بالنسبة للأنشطة التجارية :

  • البيع عن طريق الأنترنت
  • البيع عن طريق المراسلة
  • تجارة أجهزة الاتصالات بالتقسيط
  • تجارة أخرى بالتقسيط خارج المتاجر والأكشاك والأسواق
  • تجارة أخرى بالتقسيط في الأكشاك والأسواق
  • تجارة الأثاث ومعدات الإضاءة وتجهيزات منزلية أخرى بالتقسيط
  • تجارة الأجهزة السمعية البصرية بالتقسيط
  • تجارة الأجهزة الكهربائية المنزلية بالتقسيط
  • تجارة الأحذية ومنتجات من الجلد بالتقسيط
  • تجارة الأسماك والقشريات والرخويات بالتقسيط
  • تجارة الألعاب واللعب بالتقسيط
  • تجارة البصريات وآلات التصوير بالتقسيط
  • تجارة الحواسيب والوحدات الملحقة والبرمجيات بالتقسيط
  • تجارة الخبز والحلويات والسكريات بالتقسيط
  • تجارة الخردوات والصباغة والزجاج بالتقسيط
  • تجارة الزرابي والموكيت وأغطية الجدران والأرض بالتقسيط
  • تجارة السلع المستعملة بالتقسيط
  • تجارة الصحف ومنتجات من الورق بالتقسيط
  • تجارة العطور ومواد التجميل بالتقسيط
  • تجارة الفواكه والخضر بالتقسيط
  • تجارة الكتب بالتقسيط
  • تجارة اللحوم ومشتقات اللحوم بالتقسيط
  • تجارة المشروبات بالتقسيط
  • تجارة الملابس بالتقسيط
  • تجارة المنتجات الغذائية بالتقسيط في الأكشاك والأسواق
  • تجارة المنسوجات بالتقسيط
  • تجارة المنسوجات والملابس والأحذية في الأكشاك والأسواق
  • تجارة المواد الغذائية
  • تجارة تسجيلات الموسيقى والفيديو بالتقسيط
  • تجارة معدات رياضية بالتقسيط

بالنسبة للأنشطة الصناعية والحرفية:

  • النسيج وتحضير الألياف النسيجية والغزل بطريقة تقليدية
  • أنشطة تحويل وحفظ الأسماك والقشريات والرخويات
  • تحضير وصنع منتجات من الجلد
  • تحويل الحبوب
  • تحويل اللحوم والدواجن وحفظها بطريقة تقليدية
  • تحويل وحفظ الفواكه والخضر
  • تفكيك الحطام واسترداد النفايات المفروزة
  • صناعات تحويلية أخرى
  • صناعة الخبز والحلويات
  • صناعة الفراشي والمكانس والمنافض
  • صناعة يدوية للأحذية
  • صناعة يدوية للزرابي
  • صنع الأثاث
  • صنع الأطعمة والأطباق المعدة
  • صنع الآلات الموسيقية
  • صنع التوابل والبهارات
  • صنع الزيوت والدهون
  • صنع الشكولاتة والحلويات السكرية
  • صنع الصباغة والبرنيق والحبر والصمغ
  • صنع العجائن الغذائية والكسكس
  • صنع الغراء
  • صنع المثلجات والصوربي
  • صنع المجوهرات المقلدة ومواد مشابهة
  • صنع الملابس
  • صنع الملونات والصباغ
  • صنع حرفي لمنتجات النسيج والملابس التقليدية
  • صنع حرفي لمنتجات تقليدية من المعادن والصفائح لحوافر الدواب
  • صنع حرفي لمنتجات متنوعة من الخشب والقصب والحلفاء
  • صنع منتجات الألبان بما في ذلك الجبن
  • صنع منتجات تقليدية من الطين المعد
  • صنع منتجات خزفية ومن الطين المعد
  • صنع منتجات متنوعة من الخشب والفلين
  • صنع منتجات معدنية
  • صنع مواد التنظيف
  • صنع وتحويل عناصر للبناء
  • صياغة وتحويل الزجاج
  • نشر ونجر الخشب

2_ المهن التي تعتبر في اطار الخدمات:

بالنسبة للأنشطة المهنية التي تدخل في اطار التعليم:

  • أستاذ الفن المسرحي (خارج المؤسسة المدرسية)
  • أستاذ الفنون البصرية (خارج المؤسسة المدرسية)
  • أستاذ الفنون السمعية البصرية (خارج المؤسسة المدرسية)
  • أستاذ الموسيقى والغناء (خارج المؤسسة المدرسية)
  • أستاذ فن السيرك (خارج المؤسسة المدرسية)
  • أستاذ في تصميم الرقصات (خارج المؤسسة المدرسية)
  • أنشطة الدعم في مجال التعليم

بالنسبة للأنشطة التي تدخل في اطار الأشغال اليومية :

  • إزالة التلوث وخدمات أخرى لتدبير النفايات
  • أشغال إعداد المواقع
  • أشغال التركيب
  • أشغال الصباغة
  • أشغال النجارة
  • أشغال الهدم
  • أشغال تغليف الأرضية والجدران
  • أشغال جبسية

بالنسبة للمهن التي تدخل في اطار الإصلاح :

  • إصلاح الأثاث والتجهيزات المنزلية
  • إصلاح الأحذية والمصنوعات الجلدية
  • إصلاح الأدوات الشخصية والأدوات المنزلية
  • إصلاح الدراجات النارية
  • إصلاح الساعات والمجوهرات
  • إصلاح مركبات معدنية
  • إصلاح وصيانة التجهيزات والمعدات
  • صيانة وإصلاح السيارات

الأنشطة المتعلقة بالنقل والسفر والسياحة :

  • أصناف أخرى من النقل البري للمسافرين
  • الإيواء السياحي وأصناف أخرى للإيواء
  • المقاهي والمطاعم وخدمات المطاعم الأخرى
  • النقل عبر الأنهار
  • النقل على متن سيارات الأجرة
  • النقل في الحواضر والضواحي
  • الاستشارة في الأعمال واستشارات أخرى في التدبير
  • الاستشارة في العلاقات العامة والاتصال
  • تأجير واستئجار وسائل النقل
  • خدمات ملحقة بالنقل
  • مرشد سياحي
  • أنشطة تتعلق بتنظيم الأسفار والسياحة

الأنشطة المهنية المتعلقة بالفن والتصوير والثقافة والأدب…الخ:

  • أنشطة التصوير الفوتوغرافي
  • أنشطة الدعم للعروض الحية
  • أنشطة تأجير حقوق الملكية الفكرية وحقوق مماثلة باستثناء الأعمال الخاضعة لحقوق النشر
  • بهلوان
  • تجليد الكتب وأنشطة مكملة
  • تحرير الأنباء وخدمات المعلومات
  • تقني الاضاءة
  • تقني الصوت
  • تقني المؤثرات الخاصة
  • حكواتي في الفضاءات العامة والخاصة
  • راقص
  • رسام الكاريكاتور
  • رواقي
  • رئيس فرقة موسيقية
  • سينوغراف
  • صانع في الطبع الفني (سيريغرافيست)
  • عازف موسيقي
  • عرائسي
  • فضاءات للمخيمات وفضاءات للقوافل أو عربات الترفيه
  • فنان الشارع
  • فنان الميم
  • فنان رسام
  • فنان في الخدع البصرية
  • كاتب المشاهد
  • كاتب سيناريو
  • لاعب الارجوحة بالسيرك
  • لاعب التوازن بالسيرك
  • لاعب خفة بالسيرك
  • مازج الصوت
  • مبرمج العروض الفنية
  • مجازف سينمائي
  • محافظ الأستوديو
  • محافظ الخشبة
  • محافظ السيرك
  • محافظ سينما
  • مخرج تلفزي أو سينمائي
  • مخرج عرض الهواء في السيرك
  • مخرج مساعد (الفنون السمعية البصرية)
  • مخرج مساعد (الفنون المسرحية)
  • مخرج مسرحي
  • مدون الحروف الموسيقية (النوتة)
  • مدير الفنانين
  • مدير التصوير
  • مدير فني
  • مردد
  • مزين فني (مكياج)
  • مساعد تقني فني
  • مساعد منفذ الديكور
  • مصدر الأصوات
  • مصمم الأعمال الفنية التفاعلية
  • مصمم الرسوم ( غرافيك)
  • مصمم الرسوم المتحركة
  • مصمم المناظر (الديكور )
  • مصمم الأزياء
  • مصمم الصورة والحركة
  • مصمم الملابس الفنية
  • مصمم رقصات
  • مصمم صور متعددة الأبعاد
  • مصمم معلوماتي للرسوم (أنفوغرافيست )
  • مصور بالكاميرا
  • مصور فني
  • مغني/مؤدي
  • مقلد
  • مكلف بالاتصال والعلاقات العامة في المجال الفني
  • مكلف بالأكسسوار
  • ملبس الفنانين
  • ملحن
  • ممثل
  • مناولة البضائع
  • منتج
  • مندوب المعارض الفنية
  • منشط فني
  • منشط موسيقي( ديجي)
  • منظم الجوالات الفنية
  • مهندس الاضاءة
  • مهندس الصوت
  • موزع موسيقي
  • موضب الصوت والصورة ( مونطاج)
  • مؤلف
  • مؤلف درامي
  • نحات
  • نسخ التسجيلات
  • نسخ وإعداد الوثائق وأنشطة أخرى مختصة في دعم المكاتب
  • نقل البضائع عبر الطرق
  • وسيط فني
  • وكيل الفنان

باقي المهن التي تدخل في اطار تقديم الخدمات :

  • البحث العلمي في ميدان التكنولوجيا الحيوية
  • البحث العلمي في ميدان العلوم الإنسانية والاجتماعية
  • البحث العلمي في ميداني علوم الفيزياء والعلوم الطبيعية الأخرى
  • التخزين المبرد
  • التخزين غير المبرد
  • الحلاقة والتجميل والعناية بالجسم
  • الخبرة الاستشارية وإيواء المواقع الالكترونية وتطوير الأنظمة المعلوماتية
  • المغاسل والمصابغ
  • الوكالات العقارية وإدارة الأملاك العقارية
  • أنشطة أخرى لتوفير الموارد البشرية
  • أنشطة أخرى متصلة بصحة الإنسان
  • أنشطة الأمن الخاص
  • أنشطة التحقيق
  • أنشطة العمل الاجتماعي بدون إيواء الخاصة بالأطفال الصغار والمسنين وذوي الاحتياجات الخاصة
  • أنشطة الفحص و/أو العلاج المنظمة
  • أنشطة المراقبة والتحاليل التقنية
  • أنشطة تنظيف المباني بما في ذلك المباني الصناعية
  • أنشطة توضيب السلع
  • أنشطة لدعم الفلاحة واستغلال الغابات وصيد الأسماك
  • أنشطة متخصصة أخرى علمية وتقنية
  • أنشطة متخصصة في التصميم
  • أنشطة مرتبطة بالرياضة
  • تأجير واستئجار اللوازم والآلات والمعدات
  • تركيب المرايا والزجاج
  • جمع النفايات غير الخطرة
  • حفر الآبار والاستبار
  • خدمات الترحيل
  • خدمات دعم أخرى مقدمة للمقاولات
  • دراسات السوق واستطلاعات الرأي

 لائحة مهن المقاول الذاتي 2024 

في حالة مالقيتيش النشاط المهني اللي باغي أو النشاط اللي كيشملو ، إذن خاصك تقلب على شي إطار قانوني لخدمتك من غير المقاول الذاتي.

هادشي اللي قدرنا عليه الله فهاد الموضوع بخصوص كيفية الحصول على بطاقة المقاول الذاتي وكل المعلومات المتعلقة بها ، واللي عندو شي سؤال بخصوص هاد الموضوع النيت يديرو فتعليق أسفل المقال وغادي نحاولو الرد عليه فأقرب وقت ممكن

المقاول الذاتي بالمغرب 2024 : الشروط و الإمتيازات شرح كامل في دقيقتين

كيفية الحصول على أرخص تذاكر الطيران من خلال موقع Skyscanner

أسئلة متكررة حول المقاول الذاتي 2024:

من هو المقاول الذاتي؟

المقاول الذاتي أو (auto entrepreneur) هو أي شخص يزاول بشكل انفرادي نشاطاً صناعياً أو تجارياً أو حرفين أو تقديم الخدمات.

ما هي أهم مميزات المقاول الذاتي؟

– إنشاء مقاولة ذاتية بكل سهولة من خلال اعتماد إجراءات مبسطة سواء في الإنشاء أو الإغلاق،
– الإعفاء من إلزامية التقييد في السجل التجاري،
– امكانية توطين النشاط في محل السكنى،
– لا يمكن بأي حال من الأحوال الحجز على محل السكنى الرئيسي.

ما هي شروط الحصول على صفة المقاول الذاتي 2024؟

– أن يكون الشخص مغربي أو أجنبي مقيم بالمغرب حاصل على بطاقة الإقامة،
– أن يزاول بصفة فردية نشاطا صناعيا، تجاريا أو حرفيا أو تقديم خدمات مدرج ضمن لائحة الأنشطة الممكنة،
– ألا يتجاوز رقم الأعمال السقف المسموح به،
– ينبغي ممارسة الأنشطة في احترام تام للتشريعات المعمول بها.

من هم الشركاء البنكيون لبريد المغرب؟

البريد بنك, التجاري وفا بنك, البنك المغربي للتجارة الخارجية , البنك الشعبي , القرض العقاري والسياحي , مجموعة القرض الفلاحي للمغرب والشركة العامة المغربية للأبناك.

 

المصدر
وزارة الإقتصاد والمالية - نظام المقاول الذاتي المدونة العامة للضرائب 2019السجل الوطني للمقاول الذاتيالموقع الرسمي للمقاول الذاتي

‫46 تعليقات

  1. السلام عليكم انا جزار واش يمكن ليا نستافد مع العلم اني امتلك وتيقة من امين الجزارين تتبت مهارتي في العمل

  2. كيفاش فالمقالة مدكور ان سياش من الابناك غير المقبولة وفالابناك المقبولة قلتو ان العقاري والسياحي وراه سياش هو نفسو القرض العقاري والسياحي

  3. السلام عليكم
    واش ممكن للمقاول الذاتي يحصل على تسمية خاصة بالنشاط ديالي بالأضافة الى م بصرية.لي غادي يساعدوه في عملية الاشهار

  4. السلام عليكم
    واش الا دازت 5 سنوات على البطاقة واش كيجددها ولا كيدير البتانتا
    وشكرا لكم

  5. سلام عليكم عفاك انا المهنة اللي كنزاول هي مسعف سائق سيارة اسعاف وصراحة تلفت معرفتش فين نصنف هاد المهنة ممكن شي مساعدة؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *