أخبار وباء كورونا

كيفية الاستفادة من الدعم المخصص للأسر المتضررة من فيروس كورونا (شرح بالدارجة المغربية)

 الاستفادة من الدعم المخصص للأسر المتضررة من فيروس كورونا ____ يوم الإثنين 23 مارس 2020 دارت لجنة اليقظة الاقتصادية اجتماع هام بخصوص التدابير اللي خاصها تندار لدعم القطاع الغير مهيكل واللي تأثر بشكل مباشر من الحجر الصحي.

وفهاد الاجتماع توصلت اللجنة الى قرار متعلق بالطريقة اللي غايتم بها تقديم المساعدات للأسر المتضررة من التوقف عن العمل بسبب فيروس كورونا ، واللي كينقاسم لمرحلتين

هاد القرار غادي تنشرو وزارة الاقتصاد والمالية وإصلاح الإدارة مساء الجمعة 27 مارس 2020 فبلاغ صحفي على الموقع ديالها.

وغادي تشرح فيه الآلية اللي غايستافدوا بها الأسر المتضررة سواء كانت عندهم بطاقة راميد أو لا .

على العموم، حنا فهاد المقال غادي نحاولو نشرحو للقارئ الكريم كيفاش يقدر يستافد من الدعم المخصص للأسر بناء على البلاغ اللي خرجات به الوزارة.

ولكن قبل ما ندخلوا فصلب الموضوع ضروري نعرفو شنو هو القطاع الغير مهيكل :

ما المقصود بالقطاع الغير مهيكل ؟

القطاع الغير مهيكل هو ديك لخادمي اللي كيكون مولاهم ماعندو حتى شي هوية مهنية قانونية للعمل ديالو.

وبالتالي هاد الشخص كيبقى بعيد على أي حقوق أو واجبات متعلقة بالعمل ديالو.

عكس الناس اللي كتشتاغل فقطاع مهيكل واللي كتكون الدولة عارفاهوم وبالتالي كتأطر الخدامي ديالهم وكتضمن ليهم الحقوق ديالهم وأيضا الواجبات.

فمثلا، المقاول، أو الموظف أو الأجير كيتعتابرو من الناس اللي كيشتاغلو فقطاع مهيكل.

وبالتالي كيخلصوا ضرائب ورسوم وواجبات للدولة، وفنفس الوقت كيستافدو من حقوق بحال التقاعد، والتأمين الضمان الاجتماعي…

القطاع الغير مهيكل بشكل عام هو أي خدمة كيخدمها مولاها بلا ورقة بلا جوج بحال ” الفرّاشة، البناية، الحرفيين والصناع التقليديين...

واللي ما منخارطينش فأي نظام قانوني كيأطر النشاط المهني ديالهم (بحال المقاولات، المقاولة الذاتية …الخ)

المقاول الذاتي 2024 .. شرح كامل لهذا الموضوع بشكل مفصل ومبسط وبالدارجة المغربية

كيفية دعم الأسر المتضررة من فيروس كورونا COVID19 المشتغلة في القطاع الغير مهيكل :

بحسب البلاغ الصحفي فإن تدابير دعم الأسر المتضررة من فيروس كورونا كتنقاسم لجوج مراحل وهي

  • المرحلة الأولى: كتهم الناس اللي عندهوم بطاقة راميد وكيخدموا فقطاع غير مهيكل
  • المرحلة الثانية: كتهم الناس اللي ما عندهومش بطاقة راميد وكيخدموا فقطاع غير مهيكل.

1_ الأسر التي لديها بطاقة راميد :

فهاد المرحلة الأولى غادي يتم دعم الأسر اللي كتشتاغل فالقطاغ الغير مهيكل واللي فقدات المدخول اليومي ديالها بسباب الحجر الصحي اللي جا نتيجة انتشار وباء كورونا .

هاد الأسر غادي تستافد من واحد القدر مالي مخصص من طرف ” صندوق محاربة جائحة كورونا ” اللي أمر بالإنشاء ديالو الملك محمد السادس.

المساعدات المالية غادي تكون كتختالف من أسرة لأخرى فعدد الأفراد ديالها على النحو التالي:

  • 800 درهم للأسرة اللي كتكون من جوج دناس أو أقل
  • 1000 درهم للأسرة اللي كتكون من 3 الى 4 دناس
  • 1200 درهم للأسرة اللي كيتعدى عدد أفرادها 4 أشخاص

كيفية تقديم طلب الاستفادة من الدعم المخصص للأسر المتضررة من فيروس كورونا :

رب الأسرة اللي عندو بطاقة راميد هو اللي خاصو يقدم الطلب ديالو.

وعملية تقديم الطلب ساهلة ومكتطلبش الانتقال الى أي مكان حيت غير من التلفون يقدر رب الأسرة يقدم الطلب ديالو عن طريق رسالة قصيرة الى 1212.

فهاد الرسالة غادي يكون عليه يقدم رقم التغطية الصحية الموجود تحت الصورة الشخصية لرب الأسرة في بطاقة راميد كيفما هو موضح فالصورة أسفله

بالنسبة للناس اللي كانت عندهوم بطاقة راميد صالحة في 31 دجنبر 2019، فهاد الفئة تقدر تستافد من الدعم.

يعني الى عاد ماتت ليك بطاقة راميد فشهر 1 أو 2 أو 3 ، فيمكن ليك تقدم الطلب ديالك من خلال ارسال رقم الراميد ديالك للرقم الأخضر 1212.

يمكن الإدلاء بالتصريحات ابتداء من الاثنين 30 مارس 2020.
هاد الطلب خاص يديرو رب الأسرة، وماشي أي فرد من الأسرة 

ماذا بعد ارسال رقم بطاقة راميد الى 1212 ؟

من بعد ما يقدم رب الأسرة الطلب ديالو بالتلفون  غادي تقوم الجهات المختصة بالتحقق من المعلومات ديالو ودراسة الطلب.

والى كان الطلب ديالو مقبول غادي برسلو ليه ميساج على نفس الهاتف ديالو، هاد الميساج هو عبارة عن  رسالة القبول اللي كتحتوي على رقم سري والطريقة اللي غادي يتوصل بها بفلوسو.

وغادي تبقى الادارة كتواصل معاه ديما بنفس رقم الهاتف.

طريقة الحصول على الأموال:

المستفيد يقدر يشد فلوسو من خلال طريقتين :

  • يقدر يطلبو منو يخرج الفلوس من أي شباك أو توماتيكي فأي بنكة من خلال إدخال الرقم السري اللي وصلو فالتلفون.
  • أو يمشي لأقرب وكالة أداء لمحل السكنى ديالو وغادي يدي معاه البطاقة الوطنية

اللي خاص القارئ الكريم يعرف باللي الرقم السري اللي غادي يحصل عليه المستفيد ماخاصوش يعرفو أي واحد لأنه ببساطة يقدر يسبقك بداك الرقم وياخد ليك فلوسك.

متى سيتم توزيع المساعدات ؟

توزيع المساعدات غادي يبدا بشكل تدريجي ابتداء من نهار الاثنين 6 أبريل 2021.

ولكن أي واحد غادي يبغي يتلاعب أو تزغنن ليه الدبانة من خلال شي تصريح تلقائي لا أساس له من الصحة راه غادي يعرض راسوا لمتابعات القضائية.

2_ الأسر التي لا تتوفر على بطاقة راميد وتشتغل في القطاعات الغير مهيكلة :

الأسر اللي خدامة فقطاع غير مهيكل ومعندهاش راميد، واضطرت توقف عن العمل بسبب الحجر الصحي اللي فرضاتو فاشية كورونا 

هاد الأسر أيضا يقدروا يستافدون من الدعم بنفس المبالغ المالية اللي ذكرناها سابقا.

طريقة تقديم الطلب غادي تكون بواسطة الأنترنت من خلال واحد المنصة الكترونية مخصصة لوضع التصريحات.

وغادي يعلنوا على انطلاق المنصة في الأيام القليلة المقبلة.

وبمجرد اطلاق هاد المنصة غادي نقوما يكتابة مقال مفصل على كيفية تقديم الطلب باش الفائدة تعم الجميع.

للمزيد من المعلومات تقدر تتاصل بالرقم الأخضر 1212 باش تحصل على تفاصيل أكثر .

وتقدر تشاهد هاد الفيديو التوضيحي الي قدماتو وزراة الاقتصاد والمالية وإصلاح الإدارة للأسر العاملة في القطاع غير المهيكل المتضررة من فيروس كورونا.

 

بلاغ لوزارة الداخلية بتاريخ 30 مارس 2020 :

“على إثر التدابير المعلن عنها من طرف لجنة اليقظة الاقتصادية من أجل تقديم الدعم المؤقت للأسر العاملة في القطاع غير المهيكل المتضرر بحالة الطوارئ التي تم إقرارها بالمملكة

بادرت بعض الأسر المعنية إلى الانتقال إلى مقرات العمالات والملحقات الإدارية والقيادات من أجل الاستفسار عن وضعياتهم فيما يخص خدمة راميد وكيفيات الاستفادة من هذا الدعم، مما يشكل خرقا لإجراءات الطوارئ الصحية المعتمدة للوقاية من مخاطر تفشي وباء “كوفيد– 19″.

وبهذا الخصوص يجب اتباع الإجراءات المعلن عنها للاستفادة من عملية الدعم المؤقت عبر إيداع طلباتهم من خلال إرسال رقم التغطية الصحية لرب الأسرة عبر هاتفه المحمول الشخصي إلى الرقم الأخضر 1212، وعدم التردد على مقرات العمالات والملحقات الإدارية والقيادات.

كما يمكنهم الاتصال بالمنصة الهاتفية 1212 لطلب الاستفسار أو المساعدة وكذا تقديم الشكايات في الموضوع”

مواضيع قد تهمك:

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *